АДДАНАСЦЬ ПАНЯМОННЮ

З першых мастацкіх выстаў асветніцкай скіраванасці ў Гродне  з пачатку 1980-х гг. актыўна праявіла сябе выпускніца Беларускага дзяржаўнага тэатральна-мастацкага інстытута Алена Шунейка.

Яе спецыялізацыя: сцэнічны народны касцюм, ткацтва, акварэльны жывапіс, прыкладная графіка (маляваныя афішы для культурных мерапрыемстваў, дэкаратыўнае афармленне фальклорных святаў, метадычных дапаможнікаў і інш.).

І ўсё гэта яна робіць вельмі старанна, якасна і адказна. Алена Феліксаўна з пачатку 1980-х гг. працуе ў Гродзенскім абласным метадычным цэнтры народнай творчасці спецыялістам па правядзенню выстаў, плэнэраў, семінараў шматлікіх майстроў Гродзеншчыны па ткацтву, саломцы, ганчарству і іншым відам традыцыйнай творчасці і выяўленчага мастацтва.

Алена Шунейка адразу падтрымала ідэі мастацка-асветніцкага праекта “Выток Нёмана – выток духоўнасці” і пачала прымаць удзел з мінулага года ў яго творчых мерапрыемствах. 

Акварэльныя працы ў падарунак нясвіжскаму музею імя М.Сеўрука.

Ёй ёсць што паказаць на супольных выставах “нёманцаў”, бо яна ўсю сваю творчасць прысвячае роднаму краю, што называецца Панямоннем. Гэта шматлікія тэкстыльныя і акварэльныя творы.

Мастачку захапляе хараство роднай прыроды, прывабліваюць гістарычныя помнікі Гродзеншчыны. У іх адлюстраванні яна злучае традыцыйныя і наватарскія метады вобразнага бачання. 

Мы віншуем паважаную Алену Феліксаўну з днём нараджэння, які прыпадае на 1 красавіка і жадаем моцнага здароўя, творчага натхнення і добрага настрою, што даюць ёй родныя прасторы Панямоння.  

З павагай!  Т.Лухверчык, В.Лычкоўскі, Г.Мяшкова, А.Філіповіч, Ф.Ладуцька і іншыя актывісты “Вытока Немана”